விழி இழந்தும் ஊமைகளாய்..

விழி இழந்தும் ஊமைகளாய்..



இன்று பலநேரம் உறக்கமில்லை
கனவுகளின் தொல்லைகளால்..

கதறிய பிஞ்சுகளின் கண்ணீர்ச் சிதறலில்
உதறித்தள்ளும் கொடுங்கோலர் குதறலில்
குண்டடி பட்டுச்சிதைந்த ஒருமார்பில்
பாலுக்குப் பதிலாய் உதிரம் குடிக்கும் மழலைகள்
சுவைமாறிப் போனதும் தாயின் தலைவருடல் போனதும்
அறியாமல் உணராமல் அலறத்தலைப்பட்டதும்
கால்சிதறிப்போனபின்னும் உயிர்பிழைக்கவெண்ணி
நத்தைபோல் நகரும் வயதானவரின் ஓலமும்

மாறி மாறிவந்து கனவுகளாய்ச் சிதைக்கையில்
பலநேரம் உறக்கம் வருவதே இல்லை..

நிலைமாறும் பாரீர் நல்காலமொன்று வரும்பாரீர்
உலைபொங்கும் காலம் வரும் ஊர்களிக்கும் நேரம்வரும்
மெசையாவைப்போல பலகுரல்கள் ஒலிப்பதும்
அசையாமல் கிடந்து ஈக்களுக்கு உணவளிக்கும்
மறத்தமிழனின் மரத்த உடல்களின் 
இறந்தகாலக் கனவுகள் ஆங்காங்கே மினுமினுக்கும்.
ஒருமடக்குத் தண்ணீருக்காய் உடல் மறைத்துப் போராடும்
சகோதரியின் நிலைகண்டு ஊமைச் சகோதரனின் 
உதிரம் துடிக்கும் கண்ணீர் அருவியாய்க் கொட்டும்..

இத்தகு கனவுகளுடன் உறக்கச்சாத்தியம் எவ்விதம்..?

இன்று பலநேரம் உறக்கமில்லை
கனவுகளின் தொல்லைகளால்..

கையற்ற பொம்மைகள்.

கையற்ற பொம்மைகள்.

நம்பிக்கை வைக்காத மனிதன்
கையற்ற பொம்மை என்பேன்..

வாழ்க்கை எனும் வழுக்குநிலத்தைக்
கரைசேர வைக்கும் கோல் நம்பிக்கை..

அஃதின்றி 

கையற்ற பொம்மைகள்
கைதட்ட முனைவது போல்
கால் நழுவிச்செல்லும் பூமி..
கைகொடுக்க யாரும்வருவாரோ..?

அடுத்தவேளைக்காய் 
நம்பிக்கை வைத்ததால்
அசந்து உறங்குகிறது தெருநாயும்..

அடுத்த பயணம் பயனுறும் என்பதால்
காலிடுக்குகளில் கூட 
லாவகமாய் ஊர்கின்றன எறும்புகள்..

இன்றைய பூச்சி வாய் நழுவிய போதும்
நம்பிக்கையுடன் முன்னேறும் பல்லிகள்..

புறக்கையை எண்ணி 
இறுமாந்தவனைப்பார்த்து
இல்லாத கைகொட்டிச் சிரிக்கின்றான் 
நம்பிக்கை மட்டுமே கொண்ட‌
கால் மனிதன்....

நம்பிக்கை..
ஓர் ஊன்றுகோலல்ல..
நம்மை உயர்த்தும் 
சான்றுகோல்..

அவற்றை இழந்தவனைப்பார்த்து
கெக்கலித்துச் சிரிக்கிறது 
கையற்ற பூமிப்பந்து..!

கோடிகள் குவித்திடுமோ குதூகலம்..?

கோடிகள் குவித்திடுமோ குதூகலம்..?

மாடிகள் பலகட்டி மாடங்கள் பலகூட்டி
கோடிகள் கொட்டிவைத்து கட்டியதோர் மாளிகைதான்.
தேடிய விடமெங்கும் பலகணிகள் இன்பமுற‌
நாடிய நிம்மதியோ எம்மூலை தெரியவில்லை.

வாஸ்துகள் எல்லாமே சரிதான் பிசகில்லை
காற்று நுழைந்து சரசரக்கும் கட்டிடம்தான்
செங்கல்லும் சிமென்ட்டும் சரிவிகிதக் கலவைதான்.
மார்பிள் பலவிருந்தும் மார்பில் பதியவில்லை.

ஈசான மூலைகளில் இருப்பவை மிகச்சரிதான்
லேசான மிதவெளிச்சம் புகுந்துவரும் வீடிதுதான்
காணும் இடமெங்கும் கண்ணாடிப் பள‌பளக்கும்
அறைகள் பலவிருந்தும் அறையவில்லை மனசளவில்.

படுத்தால் உடல்புதையும் பஞ்சணைக்குப் பஞ்சமில்லை
அடுத்தடுத்து பலமேசை அடுக்கடுக்காய் புத்தகங்கள்
எடுத்து வைக்கும் அடியெல்லாம் மலரைப்போல் மெல்லினந்தான்
தொடுந்தூரம் குளியல‌றை தொட்டணைக்க யாருமில்லை..

கோடிகள் பார்த்ததனால் கூடிய சொந்தங்கள்
ஓடியே வந்தன ஒற்றுமையாய் உதவிபெற‌
ஆடிப்பாடி இங்கு ஆரவாரம் செய்துபல‌
தேடிய செல்வங்கள் கிட்டியபின் ஓடினவே..

என்னை உணர்ந்திங்கு என்மனதைத் தான்புரிந்து
தன்னில் ஒன்றாக்கி தன்வயம் எனைக்கொண்டு
முன்னில் மட்டுமின்றி பின்னாலும் தான்போற்றி
என்னில் வரும்வரை குவிந்திடுமோ குதூகலம்..?

கண்களை வருத்தும் கண்மணிகள்..

கண்களை வருத்தும் கண்மணிகள்..

கானல்நீரைப் பார்த்து
களைத்திருந்த கண்களுக்கு
மோனமாய் ஒத்தடம் 
தந்தவள் நீதானே..?

என் இருகண்கள் ஒன்றையொன்று 
யுத்தப்பார்வை பார்த்திருந்தபோது
சமாதானப் புயலாய்
சாதித்தவள் நீதானே..?

புருவமுடிச்சுகள் பிணைந்து
கழுத்தை நெறித்துக்கொண்டிருக்க‌
பருவ மழைபோல் வந்து
பிரித்து விட்டவள் நீதானே..?

ஒற்றைக் கண் 
ஒருவனையே பார்த்திருக்க‌
மற்றக்கண்ணுக்கும் மடல்போட்டு
மதிக்கச்சொன்னவள் நீதானே..?

இன்று..

இருகண்களுமே கண்மணிகளை
கருவறுக்கக் காத்திருக்க‌
உந்தன் சரிப்படுத்தலுக்காய்
ஓய்ந்திருப்பது தெரியாதா..?

உன் சமாதானத்துக்காகவே 
நான் சண்டையிட்ட நாட்களுண்டு
நீ பிரித்தெடுக்க வேண்டும் என்பதனால்
என் சிக்கலை தீவிரப்படுத்தியதுண்டு..

உன் வருடலுக்காகவே 
என் புருவங்கள் தினவெடுத்த 
காலங்களுண்டே..

இருகண்மணிகளும் 
இருண்டுவிடும் முன்
உன் 
ஒளிக்கிரணங்களை நீட்டிவிடு..

தற்கொலைக்குக் காரணமாய் ஆனோரும்
கொலைகாரர்கள் கணக்கில்தான்
வரவுவைக்கப்படுவதால்..

கொலைகாரி ஆகிவிடாதே..!

கலைவேந்தனின் சிலேடை வெண்பாக்கள்..

1.நாயும் கடலும்

ஓங்கியே ஆர்ப்பரிக்கும் வெண்ணுரை தள்ளிடும்
தீங்கிழைக் குஞ்சில போதினில் - ஆங்கே
இரவிலு றங்கிடும் நன்மை பயக்கும்
அரவந்த ருங்கடல் நாய்.

கடல்:

ஓங்கி ஒலிஎழுப்பி ஆர்ப்பரிக்கும்; வெண்மையான நுரை தரும்; சில போழ்து தீமை பயக்கும்; இரவு நேரத்தில் அமைதியாய் இருக்கும்; நன்மை தரும்;பாம்புகளைக் கொண்டிருக்கும்.

நாய்:

ஓங்கி ஊளையிட்டு ஆர்ப்பரிக்கும்; வேகமாய் ஓடி வாயில் நுரைதள்ளும்; சில ச்மயம் கடித்து தீங்கு பயக்கும்; இரவில் உறங்கிடும்;ஆனாலும் அரவம் தந்து நன்மை பயக்கும்!

2.இரயிலும் காதலும்

கூவிய ழைத்திடும் பக்கம்வந் தாலதிரும்
மேவிய வண்ணமாகும் மேன்மையில் - சாவுதரும்
சத்தமே கூடும் வெளிப்படும் போதென்றும்
அத்தகு காதல் ரயில்.

ரயில்: 

கூவிவரும்;பக்கம் வரும்போது நம்மையே அதிரவைக்கும்; சிறந்த அழகு தரும்; சாவைத்தரும்;
திருப்பத்திலிருந்து வெளிப்படும்போது சத்தம் அதிகமாகும்.

காதல்:

எதிர்ப்பால் மனிதரைக் கூவி அழைக்கும் காதல் உணர்வு; காதலர் பக்கத்தில் வரும்போது இருவருக்குமே அதிர்வு தரும்; காதல் சிறந்த அழகான ஒன்று; காதல் தோல்வியால் சாவும் உண்டு;
காதல் வெளிப்படும்போது அங்கே பரபரப்பான சூழ்நிலை வரும்.

அத்தகைய சிறப்பை இரண்டுமே கொண்டுள்ளது!

3.தமிழும் ஆதவனும்

ஆதியோ டந்தமிலா பேர்பெற் றதினானும்
வேதமுதல் நூல்கூறி வாழ்த்திடவும் - ஓதியே
கூற்றுவனும் சாய்த்திடாச் சீர்பெற் றதினானும்
போற்றுந் தமிழ்க்கதிரோன் நேர்.

தமிழும் ஆதவனும் ஆதியும் அந்தமும் அறிய இயலாத பேர்பெற்றவை. வேதம் முதலான நூல்களால் வாழ்த்தப்பட்டு வந்துள்ளவை. அனைத்தும் அழிக்கும் ஊழியான எமனாலும் அழிக்க இயலாத புகழ் பெற்றவை.இவ்வாறான ஒற்றுமைகளால் தமிழும் ஆதவனும் ஒன்றே!

4.காலணியும் கண்ணாடியும்.

பாதா ரவிந்தம் சுமந்திடும் மாற்றினால் 
சேதாரம் செய்திடும் மாறியே - மாதருக்கு
ஆர்வமாய் சேவையில் தன்னொளி மாய்த்திடும்
சீர்பா தணியாடி நேர்!

செருப்பு :

பாதம் முதல் உச்சிவரை நம்மைச்சுமந்திடும்! கால் மாற்றி அனிந்தால் இழப்பு நேரவைக்கும்!இடறிவிடும்!
அதிகமாய் பெண்களுக்கு அலங்காரப்பொருளாய் சேவைகள் செய்து தன் பளபளப்பை இழக்கும்! தேயும்!
சிறப்பு மிக்க காலணியும் கண்ணாடியும் ஒன்றே!

கண்ணாடி :

பாதம் முதல் உச்சிவரை நம்மை சுமந்து நம் பிரதிபிம்பம் காட்டிடும்! கண்ணாடியை சற்றே மாற்றினால் நம் உருவம் இழக்கவைத்து விடும்! எப்போதும் பெண்களாலேயே அதிகம் பயன்படுத்தப்பட்டு கண்ணாடி தன் ஒளி இழக்கும்! இவ்வாறாக சிறப்பு மிக்க காலணியும் கண்ணாடியும் ஒன்றாகும்!